Saludi a tottus,
seu meda cuntentu ca sa picciocalla paesana tengat unu atobiu po nai su chi penzat, su de si cunfrontai esti cosa manna e agiudat a cresci e a si fai benni bideas noas.
Meda bias su de no sciri, si poit fai crei ca sa cosa chi feus esti sa mellus de su mundu, o finzes ca siat sa peus, su de si atobiai cun modas, modus, genti noa e logus nous, funti donus de sa vida ca si point fetti fai beni.
De Scalepranu tengu arregordus bellus, ma medas de custus arregordus immoi ca seu cresciu du su spozzu biri cun atrus ogus. Ia a tenni prasceri a si contai de sa primu otta ca seu essiu de 'idda. Po tropu tenia unu set'annus, furia propriu pippiu, ma mancai essa piticheddu furia azzudu e brontudu cumenti fu moda a essi in bidda nosta, finzes poita ca chi furiast troppu masedu in cussus tempus is atrus picciocheddus ti ndi oganta su sonnu luegu, is prus terribilis po ti fai carateri furianta cussus dimonius de picciocheddus chi biviant in “perdugata de susu”, gei mi ndanti onau de trilla, donnia ota ca m'atobiant futi unu dannu, o fu lissa o futi anguidda, no basta de cussu, finzese is pallinas e su stirollasticu mi ndi furanta!!!
Torrendi a su contu, a set'annus fia moviu in continenti, de idda furiaiasu assumancu una bintena, ndiat de “perducata”, de “santamaria”, “mariesia”, “pratza de cresia”, “sa scalla” e finzas de “birixeddu”, ndiat de meda fedus, ma però is prus mannus no teniant prus de dox'annus, furiaiaus movendi a sa colonia de Pesaro de s'ENPAS, futi una colonia po is fillus de is impiegaus istatalis, de idda su prus furiaiaus fillus de bidellus e de maistus.
Furiaiaus propriu una bella banda!!!
Ca furiaias diversus de is atrus piciocheddus no ciant postu meda a du cumprendi is signorinas ca si avvetiant, siant postu tottus in d'una camerada impari a un'atra bintena de piciocheddus de atras biddas de sardigna, ma i meris de sa camerata si futi cumprendiu luegu ca fiaus nosu de Scalepranu, infatis, mancu imbucaus ca Carrecrobu cun Drin-drin iant attacau a cazzotus dus piciocheddus de Serramanna ca furiant fendidedis barra po su sceddu de su letu acantu si depiant crocai. Seguru ca mancu nci adessi stetiu abisongiu de si cravai .....ma cussa futi azioni po di sis fai a cumprendi ca issus furiant prus fortis. In totu sa colonia ci furiant una trintina de cameratas, su prus arribanta de su continenti de susu, de sardigna ci futi un'atra camerata, mancai abistus no teniant moda de terroristas che a nosu, ma però tengaiaus grandu arrispetu po issus po su fatu ca fiant sardus chi a nosu e Saludi a totus. Sa cosa noa chi ia osservau in cussu logu futi ca in sa camerata no c'iat diferenzias de biscinau tra nosu scalepranesus, su de essi foras s'iat onau s'idea comuna de essi no prus de birixeddu o de sa scalla ma paesanus, e candu furiaiaus torraus comenti 'e fradis.
Po assumancu una xida furiaiaus in guerra cun tottus, essaiaus sempri in truba, mannus e pitticus, facaiaus su marranu a tottus, e a onnia occasioni si cravaiaus, furiaiaus cumenti is canis arrabiosus, no s'arrendaiaus mai, furiaiaus totus allenaus a si cravai, in cunfrontu ai cussus continentalis, maicai prus basciotus, furiaiaus leonis.Ma cun su tempus si futi passau, is atrus piciocheddus teniant atrus modus po si spassiai, pariant cumenti is chi faccaiaus in bidda, ma però no accabanta mai cun scazzotadas.
Penzendudenci immoi no seu tropu orgoliosu de tottu su chi faccaiaus, ma in cussas dis furia fieru de nos, lampu arrazza de marmaglia!!!Si connosciant tottus in sa colonia, furiaiaus tottus a unu sinnu: tottus caddotzus de su pruini apicigau a sa peddi, armaus de lepixedda, scrabionaus, cun gùidus e genugus scrociollaus, stirollasticu apicau in su tzugu e busciaccas de is crazzoneddus prenas de perdixeddas tundas, tengaiaus oghixeddus allutus e palleris, ma sa cosa peus po is atrus futi ca no ogaiaus unu fueddu de italianu.......ma po cusu gei siant annomingiau “legione straniera”, ma a nosu no si n'di frigada propriu che nudda, finzes poita ca no miga d'iaus mai cumprendiu su motivu!!!mmmmm deghinò du su aiaus mottus, piciocheddus, signorinas e diretori!!!
Su sport nostu futi a cicai nius, ci da facaiaus a ndi tenni finzes i nius de sa crobetura de sa colonia, s'appicaiaus in sa grondaia e una ota in pizus no abarrat mancu una teula posta, is signorinas no ndi podiant prus, ndi tengaiaus duas, ma seguru ca no si antessi potziu sighiri mancu centu!!!Mischineddas, fiant disisperadas, no sciiant prus eita manus si onai.... fiant troppu bravas.....a botas si ndi pariat mali e tandu po da sa sfai cuntentas da sas pongaiaus in menti, “mettetevi in fila per due e tenetevi la mano” si naranta, ma chi passàt unu piccioni fu' fatta!!! Biiast sa “Legione Straniera” in azione : mancu unu segundu e tottus furiaiaus armaus de stirollasticus, boxis, tzerrius srubius de ognia arratza, in su xelu paria ca fut proendi perda, poburu picioni!!! dopu nci olliat una mesora po si pinnigai e po si torrai a ponni in fila. Fu prus forti e nos...no podeiaus abarrai frimus....furiaiaus trppu arestis, a forza de s'abitai siant cumprendiu finzes is signorinas in su coru nostu no duè fudi mallesa ma libertadi!!! Una de is urtimas dis, is signorinas, biendi ca unu pagu pongaiaus in menti, s'iant ofiu ingolli a foras de sa colonia, in d'unu parcu prenu de giogus e de atrus piciocheddus de atras colonias. In su parcu du'e furiat un'arei de piciocheddus de sa zona de Torinu gioghendu a palloni, s'iant invitau a giogai. Iau fatu una squadra totu de scalepranesus. A palloni no furiaiaus tropu fortis, ma però furiaiaus afiataus e grintosus. Mancai furiaiaus perdendi su spassiu futi meda, is torinesus furiant meda prus artixeddus e si friganta in is passagius artus, ma su svantaggiu prus mannu du tengaiaus in porta, su portieri nostu futi Labillu ca si sciiat futi su portieri prusu scarsu de “perdugata”, cussu tengaiaus e cussu s' iaus poderau!Is signorinas furiant in s'oru e su campu e fiant su tifu impari a is atrus de sa camerata, furiaiaus cuntentus meda de su tifu ca iaus recuperau. Is torinesus si zerriant “sardignoli”e nosu “pullentonis”, ma però chenza de si olli inzultai a pari, fu totu po brulla, poi iaus impromittiu a i signorinas ca no siaus a essi cravaus cun nemus sa dia. Furiaiaus cincu paris, unu torinesu, candu furia in s'oru de sa porta prontu po segniai, mi scudit una puntadepei a sa serra de sa camba e mi fait orrui. Furia ferenau, una ota pesau seu andau inzoru e d'appu castiau in is ogus chenza de nai nudda. Su torinesu, unu piciocheddu ca podiat tenni unu noi-dexi annus, mi binciat a su mancu quindixi centimetrus de artesa, ma perou teniat cara de piciocheddu masedu. Su de m'essi acostiau no di futi prasciu e miat nau: “Hei pulce non mi vorrai mica picchiare”? Tenia giai su sanguni a su ciorbeddu, “sa legioni straniera” futi giai a costau miu , furiant totus prontus a s' arrembagiu, di si serbiat feti s'incumenzu...... ma su prusu futi sa promissa fatta a i signorinas ca mi poterada.....mi furia furriau a castiai sa prus giovuna de is duas, teniat giai cara legia, in is ogus disperazioni e timoria. No si da podia fai una cosa deaici!!! Mi torru a furriai allacanas a su torinesu e di nau: “questo è rigore”!! issu chenza de arrespundi m'iat fattu ch'eia cun sa conca, m'iat castiau cun simpatia e cun d'unu sorrisu iat acciuntu:”scusa pulce, non volevo farti male” e miat stendiau sa manu po fai paxi. Ia battiu su rigori, mancai essa “pulce”ia spiazau su portieri e ia segniau, ndi futi arribata totu sa squadra, is atrus de sa camerata e is signorinas, m'iant tottu imprassau e basau. Iau bintu sa partida sesi a cincu, nci furiaus essius de su campu arriendu e brullendu cun is torinesus, furiant bravus deaberus! Iant perdiu ma furiant cuntentusu su propriu, sa dia iaus imparau meda nosu de scalepranu, sissi! Iaus bintu sa partida ma su prusu iaus bintu sa stima de is signorinas e iaus cumprendiu eita futi s' umiltadi!!
In d'unu fueddu furiaiaus CRESCIUS.